Мета му биле казината „Сенатор“, ги оштетил за 408.000 денари

Секторот за внатрешни работи Скопје до надлежното Основно јавно обвинителство во Скопје поднесе кривична пријава против Ш.И. (27) од село Грчец поради основано сомнение дека извршил три кривични дела „разбојништво“ при што стекнал противправна имотна корист од околу 408.000 денари.

Пријавениот ги извршил кривичните дела во август годинава на подрачјата на Ѓорче Петров, Карпош и Гази Баба, сите во објекти на казино „Сенатор“ и на идентичен начин – на местото на настаните доаѓал со мотоцикл „Кимко“ (без регистарски ознаки), се паркирал пред казината, влегувал и со закана со пиштол од вработените барал пари.

Првото кривично дело Ш.И. го извршил на 03.08. околу 21:45 часот на улицата „Ѓорче Петров“, второто на 11.08. околу 17:00 часот на улицата „Вангел Димов“ во клуб казиното „Сенатор“, а третото на 28.08. околу 10:45 часот на улицата „Народен Фронт“ во клуб казиното „Сенатор“. Во третиот случај, откако ги зел парите од касата, при излегување, со закана со пиштолот и употреба на физичка сила ги удирал играчите во казиното и барал да му ги дадат парите, по што го напуштил објектот.

Врз основа на преземените оперативни мерки и активности се обезбедени материјални докази, а на 6-ти минатиот месец на улицата „Козле“ кај детското игралиште покрај кејот на реката Вардар е пронајден мотоциклот „Кимко“ и е предаден за крим-техничко вештачење.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.