Али Ахмети: Избрани сме да носиме храбри и важни одлуки, а не да калкулираме

Претседателот на Демократската унија за интеграција, Али Ахмети изрази благодарност до пратениците кои соноќа гласаа за уставните измени. Тој преку соопштение се осврна и на оние пратеници кои не ги поддржаа измените и ги повика да се приклучат во понатамошните постапки за заокружувањето на овој процес.

-Ние сме избрани да носиме храбри и важни одлуки, а не да калкулираме за следните избори и следниот мандат. Тие 80 – те пратеници што гласаа за, но и тие кои што се воздржаа од гласање, знаат многу добро дека само овој пат ни носи стабилен мир, добри меѓуетнички и добрососедски односи, системски реформи, правна држава и владеење на правото, еднаквост и заокружување на Охридскиот Договор, економски развој, повеќе работни места , странски и домашни инвестиции и општествена благосостојба, вели Ахмети во соопштението.

Претседателот на ДУИ ја повика опозицијата да застане на исправната страна на прогресот и евроатланската определба без задоцнување и понатамошни калкулации.

-Одмор нема. Уште од денес продолжуваме со работа за да го заокружиме овој процес, порача Ахмети и додаде дека „заедно сме посилни“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.