Мицкоски за ДВ: Наскоро ќе го слушнете мојот забранет говор!

Деновиве сите очекувања се свртени кон опозициската ВМРО-ДПМНЕ, со надеж дека нејзините пратеници ќе покажат одговорност во парламентот и ќе дадат поддршка на уставните измени кои се обврска од Договорот од Преспа, пишува Дојче веле.

Христијан Мицкоски во разговор за Дојче веле објаснува дека „во текот на денов“ ќе даде коментар/одговор на пораките од писмото. Но, има став за одбиеното барање да им се обрати на пратениците во парламентот.

Во продолжение Ви пренесуваме дел од интервјуто со претседателот на ВМРО-ДПМНЕ Христијан Мицкоски дадено за Дојче веле:

ДВ: Што е она што досега не сте го соопштиле или не можете да го кажете на прес-конференција и со видео-обраќање, па ја побаравте и говорницата во парламентот?

– Бидете трпеливи, денес-утре ќе го слушнете забранетиот говор и сето она што сакам да и го соопштам на јавноста како моја порака.

ДВ: Зошто го дефинирате како „забранет говор“, кога Деловникот не предвидува можност за ваше обраќање во Собранието?

– Јас знам дека во парламентот досега биле дозволени обраќања на многу личности кои не биле пратеници. Во изминатиот период се обрати Могерини, се обрати Столтенберг… Ако можеа странски претставници да се обратат, не разбирам зошто не може да се обрати и лидерот на најголемата опозициска партија? Во доцните деведесетти се обратија и студентите, и имаме многу други примери во минатото. A само еден ден претходно од премиерот чувме пораки за помирување, простување…

ДВ: Но, Заев не е домаќин во парламентот, не може тој да ве кани…

– Како и да е, јавноста ќе ја слушне мојата порака многу брзо преку забранетиот говор.

ДВ: Има ли шанса заедно со Заев да најдете заеднички јазик за Договорот од Преспа?

– Има шанса да констатираме дека Договорот е мртов. Секое натамошно силување на овој процес само ќе произведе дополнителни тензии и поларизации во општеството, а единствен виновник за тоа е Зоран Заев кој ветуваше нешто што не може да го исполни. Како пропадна предлогот ‘Илинденска Македонија’? Ципрас рече дека нема 151 пратеник што ќе го прифати тој предлог т.е. дека нема мнозинство во грчкиот парламент. Зошто Заев не рече: ‘Немам двотретинско мнозинство, и не го прифаќам предлогот Република Северна Македонија’!?

ДВ: Меѓународната заедница не гледа вина кај Заев. Акламативно му честитаа за постигнатиот договор и нему, и на Ципрас.

-Јас го кажувам моето мислење. Тоа беше планот А на Зоран Заев. Тоа не беше планот А на опозицијата.

ДВ: А кој е вашиот план А?

– Нема промена на Уставот со цел да се промени уставното име.

ИЗВОР: ДОЈЧЕ ВЕЛЕ

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.