Игор Минарков, тренер по кросфит: Работата на себе е најдобрата работа што човек може да си ја дозволи!

„Во здраво тело, здрав дух“, е максимата со која едно време се растеше и созреваше. Се повеќе сме опкружени со луѓе кои се заинтересирани да го сочуваат своето здравје и да го продолжат животниот век, па се обидуваат на повеќе начини да го постигнат тола. Згодни тела и убави и здрави лица кои живеат здрав начин на живот, возат велосипед наместо автомобил, јадат повеќе овошје и зеленчук на сметка на тесто и месо…

„Работата на себе е најдобрата работа што човек може да си ја дозволи. Телото е единственото место во кое живеете. Тоа може да биде вашето „Addidas“ или да изберете да носите нешто што не ви се допаѓа. Бидете живи и здрави, во здраво тело!“ вели Игор Минарков, кој работи како кросфит тренер три години.

Кросфитот станува многу актуелен последние години. Тренерот Грег Гласмен, поранешен гимнастичар, го оформил CrossFit®, Inc. во 2000 година откако поминал години и години во тренирање на елитни спортисти. На кратко, кросфит е  комбинација на олимписко кревање на тегови, гимнаситка, трчање, веслање и основни кардио-васкуларни вежби со кои се подобруваат севкупната флексибилност, сила, брзина, издржливост и агилност.

Игор Минарков работи како кросфит тренер три години

– Кросфитот е актуелен поради неговата разноликост, интензитет, забавна структура, одлично дружење и прекрасно чуство на леснотија, односно да ги цитирам моите вежбачи: ‘Исфрлање на негативната енергија’ – вели Минарков.

Часовите на Минарков  ги посетуваат и мажи жени. Но, не е важно само да го тренираш, треба и да го„живеееш“ кросфитот. Тој објаснува што опфаќа неговиот начин на живот.

– „Кросфит“ подразбира дисциплиниран начин на живот.  Тоа значи рано будење, неколку тренинзи во тек на денот. Читање на модерна литература за теоретскиот дел да биде надграден, со тоа и воспоставување на нови програми. Практицирањето на кросфит значи рано легнување, контролирана исхрана од аспект на што и кога се внесува во тек на денот – објаснува Минарков, чии тренинзи се одржуваат во скопската гимназијата „Јосип Броз Тито“.

Со кросфит може да се занимава секој кој ќе посака.

– Ограничувања постојат и постоеле само во главата на индивидуата. Чуството за старост го правиме ние самите. Постојат луѓе што изгледаат фит на 70-80 години и луѓе што на 20-тина години веќе почнуваат да изгледаат старо – вели Минарков.

Тој води повеќе групи, од почетници, до напредни групи.

– Секој човек е уникатно битие. Некој има спор, некој брз метаболизам. Некој е склон на мускулна маса, некој поспоро качува/симнува мускулна маса. Многу е важна исхраната, таа е клучен фактор за тело што убаво изгледа. Воедно, колку самиот човек ќе вложи на самиот тренинг. Што е фит линија? Што е посакувана линија? Од која килажа на која сака индивидуата да намали? Сепак, ова е едно прашање на кое треба да се работи индивидуално со секој субјект – вели кросфит тренерот.

Кросфитот е здрав начин на живот и откако лицето ќе ја постигне целта – да речеме убаво тело или зголемена физичка подготвеност, за да ја задржи истата форма треба да ја задржи исхраната и тренингот.

– Загадувањето е проблемот. Македонките/ците, ќе се грижат кога ќе излезат на протест против загадувањето, кога ќе почнеме да возиме велосипеди, да ја заборавиме старата балканска навика на дружење со месо и неконтролирано пиење. Тогаш би рекол дека се грижат, изгледот е сепак споредна работа. Со добар тренинг, изгледот доаѓа посекако – завршува Минарков.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.