Коѕијас: И ние, и Владата во Скопје, мислевме дека излезноста ќе биде поголема

– Имавме информација од владата во Скопје дека на референдумот ќе излезат помеѓу 40% и 45%. Ние, пак, мислевме дека излезеноста ќе биде 41%. Се покажа дека одѕивот беше понизок и од тоа, вели грчкиот министер за надворешни работи Никос Коѕијас во интервјуто за ЕРТ.

Ниската излезеност Коѕијас ја објаснува со непрочистениот Избирачки список, стар над 20 години. Вистинското гласачко тело е малку над еден милион граѓани, вели тој, посочувајќи дека над 300.000 граѓани се отселени од земјата.

Грчкиот шеф на дипломатијата смета дека и покрај тоа што е многу тешко да се обезбеди двотретинско мнозинство, уставните измени треба да се случат во Собранието во Скопје. Доколку пропадне процесот за имплементација на договорот за промена на името, соседната земја ја очекува најлошиот пат, вели тој.

Запрашан за негово мислење околу улогата на Албанците на референдумот, тој вели: „Помалите албански партии, како што е партијата Беса, за кои турскиот печат вели дека се финансирани од Турција, повикаа на апстиненција на референдумот. Нашите граѓани би требале да се запрашаат дали ова коинцидира со политиката на најцрните сценарија на Турција“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.