Граѓаните прашуваат: Ќе има ли санкции за премиерот кој бара мито за гласачите?

Класичен поткуп и криминал – вака граѓаните ја оценија изјавата на премиерот Зоран Заев во која тој ги повика стопанствениците да ги почестат вработените кои на референдумот на 30-ти септември ќе гласаат за промена на уставното име на земјата. Револтирани прашуваат, со кое право премиерот агитира кај гласачкото тело, бидејќи како што велат тоа се коси со сите законски норми во државата.

Заев ги повика газдите да ги купат гласовите на работниците: Отворете го ќесето, ова е важно (видео)

Одговорност мора да има бидејќи, како што велат, нудењето мито за референдумско изјаснување не е дозволено во ниту една европска држава. Сепак, не веруваат дека институциите соодветно ќе реагираат.

Инаку, во средата на трибина во Крива Паланка, Заев им порача на бизнисмените да го одврзат ќесето и на вработените да им поделат бонус плата пред референдумот. Тој призна дека разговарал со газдата на „Минстрој“, сопственик на рудниците „Злетово“ и „Тораница“ и оти добил ветување дека вработните во оваа компанија ќе добијат плата плус ако гласаат на референдумот.

Реагираше и синдикатот за индустрија, енергетика и рударство. Оттаму бараат газдите да не вршат политички притисоци врз работниците пред референдумот.

Инаку, обидот за поткуп при избори и влијаењето како да се гласа е казниво со затвор според Кривичниот законик. Во членот 162 јасно стои дека „Тој што на лице со избирачко право му нуди, дава или ветува подарок или друга корист, со намера да го придобие да го врши, да не го врши или како да го врши избирачкото право, ќе се казни со затвор најмалку пет години“.

Видеото погледнете го на „Алфа“. 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.