Случај ТНТ: Адвокатот Тасевски казнет затоа што во исто време не можел да биде во две судници

Денешното рочиште за предметот „ТНТ“, за уривањето на станбено-деловниот комплекс „Космос“ на бизнисменот Фијат Цаноски, е одложено за 10 септември, бидејќи бранителот на поранешниот градоначалник на општина Гази Баба, Тони Трајковски, Боро Тасевски, не се појави во судницата, за што од судијата Огнен Ставрев доби парична казна во висина од 1.000 евра, во денарска противвредност.

Веднаш по почетокот на рочиштето судијата Ставрев даде пауза од половина час со цел Трајковски да го повика неговиот бранител или да назначи нов бранител за денешното рочиште.

По паузата, Трајковски нагласи дека стапил во контакт со Тасевски и дека тој сепак не може да присуствува на рочиштетот бидејќи е во одбраната на поранешната министерка за внатрешни работи Гордана Јанкуловска, за случајот „Тенк“.

Судијата Ставрев го одложи судењето за 10 септември поради необезбедена одбрана на обвинетиот Трајковски и одреди парична казна за Тасевски, поради, како што посочи тој, навреда на судот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.