Мицкоски: Нека денешниот ден биде сведок и пример дека со искрена волја, чисто срце и верба можни се големи работи (ГАЛЕРИЈА)

Претседателот на ВМРО-ДПМНЕ Христијан Мицкоски е во посета на Берово каде масовно се прославува празникот Успение на Пресвета Богородица. Тој најпрво прошета низ беровската чаршија каде оствари средба со граѓани од Берово. Потоа тој ќе го посети манастирот Успение на Пресвета Богородица.

Мицкоски во текот на денот ќе го посети и паланечкиот манастир Свети Јоаким Осоговски каде исто така се празнува денешниот верски празник.

Претседателот на ВМРО-ДПМНЕ Христијан Мицкоски, по повод празникот Успение на Пресвета Богородица упати честитка до Поглаварот на Македонската Православна Црква- Охридска Архиепископија, Архиепископ Охридски и Македонски Г.Г. Стефан и до сите православни верници.

-Дозволете ми Вам лично, на членовите на Синодот и на сите православни верници, од мое лично име и од име на ВМРО-ДПМНЕ, да Ви го честитам големиот христијански празник Успение на Пресвета Богородица и да ја изразам мојата желба за многу среќа, радост и мир во душите на сите христијански верници. Денешниот празник е сведоштво за мајчинската љубов, верата во Христа, и пожртвуваноста која е исполнета со добри дела и хуманост кон човештвото. Правејќи добри дела, создаваме и оставаме зад себе трајни вредности и секој еден на тој начин придонесува со свој личен пример за развојот на нашата земја и создавање на подобра иднина, стои во честитката на Мицкоски и се додава:

„Верувањето во Христа, пожртвуваноста на мајката Богородица не учи дека добрите дела кон ближните, кон знајните и незнајните нема да останат незабележани, и тие се траен влог во изградбата на една личност. Нашиот народ децении и векови наназад покажал искрена верба во Христа, споделување на заедничките христијански вредности, кои се општи, универзални и човечки. Нека денешниот ден биде сведок и пример дека со искрена волја, чисто срце и верба можни се големи работи. Нам ни треба земја каде напредокот и среќата на нејзините граѓани ќе бидат во самите приоритети, земја каде ќе се работи на намалување на растечката сиромаштија, ќе се помага на гладните, а болните ќе ја добијат од системот на државата потребната грижа и услуга“.

Денес, се потенцира во честитката, нашата држава се соочува со бројни предизвици, а иселувањето на младите е еден од нив.

-Нивното раселување значи изгубена и уништена иднина, затворени куќи, напуштени родни огништа. Треба сите заедно да придонесеме да создадеме подобра иднина, подобри услови за живот и само така ќе бидеме од полза на нашата земја и општество. На нашата земја и е потребна и сплотеност и обединетост, за да се постигне ова, треба да се стави крај на политичката одмазда и политички прогонуваните случаи. Македонија мора да започне да оди напред и да ги користи сите свои потенцијали, затоа што само така Македонија ќе победи! Нека ни е честит и вековит големиот христијански празник Успение на Пресвета Богородица!

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.