Министерството за правда почна постапка за екстрадиција на двајца обвинети во „Монструм“

Од Министерството за правда до Основниот суд Скопје 1 утрово пристигнало писмо со известување дека и официјално е започната постапката за екстрадиција на двајцата обвинети во случајот „Монструм“, Африм Исмаиловиќ и Алил Демири, кои се наоѓаат во Косово.

Екстрадицијата на обвинетите во „Монструм“ закочи пред судот во Приштина

Судењето за „Монструм“ почна од почеток во мај откако предметот го презеде СЈО. Обвинетите за петкратното убиство кај Смилковското Eзеро што се случи на 12 април 2012 година, беа осудени на доживотни казни затвор за потоа Врховниот суд да утврди серија пропусти во водењето на постапките и да ги укине пресудите.

Највисокиот суд ги ослободи од притвор осудените Агим Исмаиловиќ, Хаки Азири, Сами Љута и Фејзи Азири и им определи мерки на претпазливост, односно да не смеат да го напуштат градот во кој живеат, а имаат и обврска двапати неделно да се јават во Основниот суд Скопје 1.

По Алил Демири и Африм Исмаиловиќ имаше распишано меѓународна потерница. Тие со години се во бегство во Косово.  Тамошните власти го одбија барањето за екстрадиција бидејќи тврдеа дека не биле доставени доволно докази што укажуваат на нивна вмешаност во случајот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.