Курц: Бродовите со мигранти да не се пуштаат во Европа

Во време кога Малта и Италија се натегаат околу прашањето на прифаќањето на мигрантите кои секојдневно по воден пат пристигаат во земјите од Европа, австрискиот канцелар, Себастијан Курц, излезе со јасен став.

Курц апелираше до земјите членки да не дозволат бродовите со мигранти да стигнат до Европа.

Додека италијанскиот министер за внатрешни работи, Матео Салвини, се закани дека ќе ги враќа мигрантите директно во Либија, доколку другите земји членки на Европската Унија не сакаат да ги прифатат, австрискиот канцелар се изјасни дека бродовите што доаѓаат од Африка не смее да се дозволи да стигнат и да останат во земјите членки на Европската Унија.

Претходно тензиите меѓу Италија и Малта поради миграцијата ескалираа. Италијанската влада бара помош од Европската Унија за решавање на миграцискиот спор со Малта и се закани дека ќе ги врати спасените мигранти во Либија, што би било нелегално бидејќи враќањето на мигрантите во Либија би било спротивно на меѓународното право затоа што станува збор за „небезбедна земја“, според меѓународните стандарди за спасување.

Во средата Малта не го спаси бродот со мигранти, порачувајќи дека не бил во опасност. Кога бродот стигнал близу Лампедуса, Дишиоти го спасил. Малтешкиот премиер порача дека мигрантите се наоѓаат на италијанска територија и дека очекува Унијата и Италија да си ги исполнат обврските и дека Малта го почитувала меѓународното право.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.