Пoпов: МВР да го објави работниот налог на Димовски за Охрид, кој е овластен само за Скопје

МВР ТУРС продолжува да вози во летните денови, продолжуваат скандалите на МВР со злоупотреба на службените возила, МВР ТУРС по турите до Солун, сега организира и бесплатни тури со службени возила до Охрид, рече денеска Сергеј Попов од ВМРО-ДПМНЕ, по откривањето на медиумите на друга злоупотреба на службени возила во МВР.

– По злоупотребата на службено возило за приватни потреби на сега поранешниот директор на БЈБ, Лазе Велковски, медиумите објавија дека службено возило во текот на минатата недела користел и Командантот на единицата „Алфа“ Примислав Димовски. На фотографија која ја објавија медиумите се гледа како службено возило на МВР, управувано од Димовски се наоѓа на паркинг во Охрид. Единицата „Алфа“, чиј командант е Димовски има овластувања за дејствија само на територија на Градот Скопје, активности надвор од Скопје може да врши само со претходно овластување од Началникот на СВР Скопје, нагласи Попов.

Тој праша што бара началник на единица чие овластување за делување е само во Скопје, со службено возило да патува во Охрид, која задача ја вршел или пак бил на приватно викенд патување?

– Ако навистина имал работна задача во Охрид, еве го повикуваме МВР јавно да го објави налогот кој наводно го имал Димовски? Се друго во спротивно на ова е лага и манипулација од страна на МВР ТУРС и уште една злоупотреба на државни ресурси за приватни цели. МВР и Димовски да излезат и да го покажат налогот со овластување доколку го има, во спротивност Димовски да си поднесе оставка на функцијата Командант на единицата „Алфа“. Злоупотребите кои се заштитен знак на СДСМ не смеат да останат неказнети. Одговорност мора да има, потенцира Попов.

Откако веста за злоупотреба на службено возило за приватни цели беше објавена во медиумите, од МВР соопштија дека немало злоупотреба и дека Димовски возилото го користел законски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.