Македонија го совлада Азербејџан на ЕП во Скопје

Јуниорската репрезентација на Македонија денеска го совлада Азербејџан со 65:50 на Европското првенство за кошаркари до 18 години, Б дивизија, што се одржува во Скопје.

Македонските кошаркари со вчерашниот убедлив триумф против Данска успеаја да остварат две победи во низа и ќе играат за пласман на 17-та позиција на првенството.

Избраниците на селекторот Панче Милевски уште од стартот на натпреварот воспоставија контрола над теренот и имаа резултатска предност, која рутински ја одржуваа до крајот.

Лука Стојановски со 18 поени и пет скока беше најефикасен во македонската репрезентација, а Валмир Какруки реализираше 17 поени.

Македонија за 17-то место на првенството утре ќе се соочи со победникот од натпреварот меѓу Луксембург и Швајцарија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.