Грчките медиуми за вчерашната одлука на ЕУ: „Кочница од Франција и Холандија за ПЈРМ“

Советот за општи работи на ЕУ го поздрави Договорот од Преспа“; „Преговори за интеграција по евроизборите во 2019“; „ДА со услови за Албанија и Скопје за пристапни преговори“; „ЕУ: Зелено светло за ПЈРМ-Албанија, но од 2019“; „ПЈРМ и Албанија започнуваат преговори за интеграција во ЕУ“; „Кочница од Франција и Холандија за ПЈРМ“, се дел од насловите во онлајн изданијата на грчките медиуми за вчерашната одлука од Луксембург за европската перспектива на Македонија и Албанија.

– И покрај приговорите од Франција, Данска и Холандија, за да не се даде зелено светло за пристапни преговори за Албанија и поранешната југословенска Република Македонија, советот за општи прашања на ЕУ постигна договор „да се отвори патот за пристапени преговори“ во јуни 2019, објави Јуроњуз на грчки јазик.

Грчката новинска агенција АНА-МПА акцентот го става на позитивниот коментар на советот за општи прашања за Договорот од Преспа, ги пренесува заклучоците, како и изјавата на Захариева.

Како што јави дописничката на МИА од Атина, според грчките медиуми, министерот за надворешни работи на Грција бил еден од најгласните поддржувачи, Македонија и Албанија да добијат датум за почеток на пристапни преговори со унијата.

– И покрај особено големите напори на грчкиот министер за надворешни работи Никос Коѕијас, кој ги импресионираше неговите колеги со страста и упорноста што ги покажа за да ги презентира придобивките што би постоеле ако веднаш започнат пристапните преговори со ПЈРМ, Франција, Холандија и Данска не прифатија да започне процесот, пишува „Катимерини“

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.