Само седум го мијат целиот град: Шилегов нема доволно цистерни да го испере Скопје

При движење на возилата, прашината се крева во воздухот најчесто во зоната на дишење. Таа може да предизвика сериозни заболувања кај населението, велат здравствените работници. Од ЈП”Комунална хигиена” велат дека машини метлачки ја собираат прашината од коловозите, а со седум автоцистерни ги мијат главните сообраќајници, но тој број е премал и потребно е да се купат нови автопрскалки, пишува дневниот весник Вечер.

Според анализата која пред неколку месеци ја објавија од Град Скопје, прашината од неуредените површини, уличната прашина и прашината од градежните активности придонесува во вкупното аерозагадување со 19%, што секако не е процент за занемарување. Така што, секако е неопходно градежните активности и прашината која се емитува од нив и се таложи по улиците треба подобро да се регулира.

Од ЈП “Комунална хигиена” велат дека во текот на летниот период постојано ги чистат улиците од прашина, но и со миење. Велат дека проблем е што бројот на цистерни е премал.

– Претходно пофреквентните улици ги поминуваме со машини метлачки и рачно со метлачи. Третата смена ги мие улиците со седум цистерни кои поминуваат речиси во секоја општина, особено на главните и најфреквентните улици. Третата смена почнува по 22 часот, тоа е долгогодишна пракса во “Комунална хигиена” да се пуштаат цистерните кога фреквенцијата на возила низ улиците е намалена. Но, по потреба во летниот период цистерните ги пуштаме и преку ден. При тоа внимаваме да не го закочуваме сообраќајот – вели директорот на ЈП “Комунална хигиена” Абдусамед Шабани.

– Бројот на автоцистерни реално не е доволен ако ја гледаме потребата на градот, сметам дека доволно би ни биле 20 цистерни за да ги пуштаме во три смени. Имајќи го предвид капацитетот и финансиските можности на претпријатието, сакаме да го зголемиме бројот на цистерни до крајот на годинава, додава тој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.