Арсовски: Фактот што Коѕијас нè ословува со Северномакедонци, а Заев молчи е најголем доказ дека се откажал и од идентитетот

Министерот за надворешни работи на Република Грција, Никос Коѕијас, потврди дека со капитулантскиот договорот кој го потпиша Зоран Заев се менува идентитетот на народот. Имено Никос Коѕијас јасно и недвосмислено го искористи терминот Северномакедонци на меѓународна конференција. Придавката северномакедонски за Македонците е веќе во употреба, обвинуваат од ВМРО-ДПМНЕ.

-Колку Заев и да ја лаже јавноста дека забетонирал нешто, вистината говори дека со договорот е директно нарушен нашиот идентитет. Кој лаже сега господине Заев? Зошто нема демант или протесна нота од Министерството за надворешни работи, зошто сеуште не го демантирате грчкиот премиер Ципрас кој јасно изјави дека не постои македонска нација, поточно со договорот не е признаена? Дали не ви смета што грчки министер за надворешни работи не ословува со сменет идентитет северномакедонски? Ја преименувавте Македонија ерга омнес, а гледаме дека во тој пакет сте го преименувале и македонскиот народ и македонската нација. Со договорот направивте од готово – вересија, односно надвор од резолуцијата на Обединетите Нации преговаравте и го променивте нашиот идентитет. Придавката македонски од јазикот и националноста, која не беше недвосмислена и црвена линија во националната стратегија по ова прашање, вие ја продадовте многу евтино, истакна Димче Арсовски, портпарол на ВМРО-ДПМНЕ.

Од партијата наведуваат дека изјавите доаѓаат од потписник на договорот и дека со тоа се гази достоинството на Македонците.

– Изјавата дека сме Северномакедонци не доаѓа од било кого. Таа доаѓа од Никос Коѕијас, кој е потписник и директен учесник во преговорите од страната на Грција. Оваа влада на чело со Заев ги лаже – ги суши граѓаните на Република Македонија. Секое достоинство на Македонците е погазено со договорот кој беше потпишан во Преспа. Погазено е уставното име, погазен е идентитетот на народот, погазен е и македонскиот јазик. Чинителот на оваа срамна капитулација има име и презиме. Тоа е, почитувани, Зоран Заев, кој поради распродажбата на националните и државните интереси може да заврши на буништето на македонската историја како нов Коте од Руља, порачува Арсовски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.