Издавачката куќа „Антолог“ од Скопје со огромно задоволство ја најавува промоцијата на две обновени изданија на Лилјана Дирјан – Тешка свила и Снег за двајца, која ќе се одржи в сабота (16 јуни 2018 година) во „Цреша бар“, со почеток во 19:30 часот. На промоцијата ќе учествуваат: Оливера Ќорвезироска, Лидија Капушевска-Дракулевска, Ана Зафирова, Јовица Ивановски, Петар Андоновски и Јасмина Пакашки.
Двете обновени дела на Лилјана Дирјан излегоа во издание на „Антолог“ непосредно пред Саемот на книгата 2018 година.
„Тешка свила“ е поетска збирка, поделена во три целини; флуидна поетика на секојдневјето исполнета со носталгични сеќавања од детството, младоста, себеоткривањето преку очите на другиот, брачниот живот, мајчинството, патувањата… Ослободена од тривијална сентименталност и патетика, оваа збирка ни дава слика за индивидуалното поетско доживување и сеќавања на некои минати времиња, фасцинацијата од ориенталната култура; со умерен еротизам, прикажен преку призма на (в)љубена жена, со целата нејзина нежност и потреба за допир…
„Снег за двајца“ е прозно дело на Лилјана Дирјан. Станува збор за експериментална проза со суптилни елементи на поезија, есеизација и романескна тенденција. Напишана е во форма на дневник меѓу два лика што некогаш биле во љубовна релација. Двата лика, Отсутниот и Присутната, ја читаат Марина Цветаева. Дирјан интегрира цитати, делови од писмо на Марина Цветаева напишано до поетот Евгениј Лозман, зимата 1920 година. Секако, покрај Цветаева, Дирјан комуницира и со многу други врвни писатели како Кафка, Бродски, Песоа, Сабато, Бекет, Бела Хамваш, Даша Дрндиќ… Никогаш директно не го открива изворот, туку му препушта на читателот да се движи по оставените траги.
Лилјана Дирјан (1953-2017) е родена во Скопје. Дипломирала на Филолошкиот факултет во Скопје. Била на студиски престој во Париз како стипендист на француската влада и Фондацијата „Губелкијан“. Поезијата на Дирјан е преведувана на многу јазици и е застапена во антологиите на македонската современа поезија. Долги години работела како главен уредник на списанието „Жена“. Била еден од основачите и член на Друштвото на независни писатели на Македонија, како и уредник и еден од основачите на регионалното списание за литература „Сараевски тетратки“.
Нејзиниот творечки опус ги опфаќа книгите: Природна појава (1980), Жива мера (1985), Пелин поле (1989), Champs d’apsinthe (Est / Oust Internacionales, Париз, 1996), Тешка свила (1997), Cocoooons (Chatanooga Chapbooks, САД, 1999), Schwere Seide (Corvinus Presse, Берлин, 2000), Приватни светови (2007), Privatni svjetovi (OKF – Cetinje, 2009), колумни и патописи Саѓи врз снегот (2007), Светот мојот брат (2008), Со невидлив сокол на рамото (Софија, 2011), Снег за двајца (2011), Snjeg za dvoje (OKF – Cetinje, 2013). За своето творештво е наградена со признанијата „Студентски збор“ и „Браќа Миладиновци“.
Со постхумното објавување на овие две обновени изданија, „Антолог“ искрено се надева дека ќе придонесе кон зачувување од заборав на големото и многу значајно книжевно дело на Лилјана Дирјан.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
