Матурската парада ќе се одржи в петок на пладне на плоштадот “Македонија”

Годинешната матурска парада ќе се одржи в петок на 18 мај, точно напладне, во Скопје на плоштадот Македонија, посочи Елизабета Кузмановска од Дирекцијата за култура и уметност. Таа наведе дека покрај во Скопје, матурската парада ќе се одржи и во Струга, Охрид, Струмица, Гевгелија и Куманово.

– Оваа година покрај Македонија во проектот ќе учествуваат матуранти од 62 градови во Босна и Херцеговина, Бугарија, Словачка, Словенија, Србија, Турција, Унгарија, Хрватска и Црна Гора – изјави Никола Глигоров од Дирекцијата за култура и уметност кој нагласи дека оваа година се очекува на настанот да учествуваат над 30.000 матуранти.

Дирекцијата за култура и уметност на Скопје манифестацијата ја организира во соработка со Танцовиот спортски клуб Ритам плус.

Даниела Адамова, раководител на Секторот за образование на Град Скопје посочи дека настанот почнал да се одбележува како празник кога се слави матурирањето, односно празникот на младоста. Таа најави дека покрај овој настан наскоро ќе се одржи и “средбата меѓу првиот и најдобрите”, каде што градоначалникот на Скопје, Петре Шилегов ќе оствари средби со најдобрите ученици и ќе им додели признанија.

Тодор Миладинов од Ритам плус посочи дека танцовиот клуб ги обучувал матурантите за време на часовите по физичко во нивните средни училишта.

– Очекуваме околу 1.100 матуранти да учествуваат на матурската парада – истакна Миладинов.

Од Дирекцијата наведоа дека ќе се каже “клетвата за ненасилство” од страна на учесниците во сите градови во земјите во кои се одржува матурската парада.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.