Шефот на грчката дипломатија, Никос Коѕијас пристигна во Охрид

Грчкиот министер за надворешни работи Никос Коѕијас, попладнево допатува во Охрид. Предвидено е тој вечерва да има работна вечера со неговиот домаќин, шефот на македонската дипломатија Никола Димитров, додека официјалниот дел од средбата е предвиден за утре.

Разговорите утре во Охрид ќе бидат продолжение на преговорите за надминување на проблемот што Грција го има со уставното име на Република Македонија. И двајцата дипломати воочи утрешната средба истакнаа дека очекуваат позитивен напредок во разговорите, во насока на натамошно зближување на позициите, но далеку од решение за кои Атина инсистира на уставни промени за кои Македонија смета дека не се потребни.

– Се надевам на прогрес и мислам дека однесувањето на Грција и Македонија во однос на процесот сигнализира дека процесот е во деликатна фаза и  фокусирани сме токму на овие разговори. Се надевам дека ќе ни помогне што оваа рунда се одржува во Охрид, изјави Димитров пред средбата со Коѕијас.

Шефот на грчката дипломатија денеска во Белград пред да отпатува за Охрид рече дека е направен чекор напред во решавање на спорот за името и оти за негово затворање е потребен компромис.

– Реализам и прагматизам е клучот на решението. Потребен е компромис, но не гнил компромис. Двете страни мора да разберат дека не можат да добијат се, рече тој по средбата со српскиот министер за надворешни работи Ивица Дачиќ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.