Промоција на првата книга за деца на Матеј Богдановски „Приказни од Чудновија“

Во Кино Култура на 12 април (четврток) во 20 часот ќе се одржи промоција на книгата „Приказни од Чудновија“ на уметникот Матеј Богдановски.

– Книгата е правена по стриповите КШШЦ, и Патенталија и Тентелина, ова е мојата прва книга за деца, во која низ 17 приказни е претставен еден бајковит свет – вели Богдановски во најавата за настанот.

Промотор на книгата ќе биде академската сликарка и професорка на Ликовната Академија во Штип, Јана Јакимовска.

„Светот на Чудновија почнав да го создавам кога имав 10 или 11 години. Како и сè во детството и ова беше една моја игра и забава која ја искажував низ цртежи и досетки што ги правевеме со брат ми Дамјан. Всушност, овој свет првично е измислен како Хелуинленд. Во почетокот на 90-тите години на минатиот век празникот Хелоуин беше сè уште егзотика кај нас. Запознаен со него преку првите сателитски канали, цртани филмови и видеоигри, целиот амбиент што тој го носеше со себе, со изрезбаните тикви и со наивната стравичност, ликовите на вештерки, вампири, духови, костури и тиквоглавци, беше интересен за нашата возраст, а, ете, за мене дури и инспиративен. Тогаш ги запишав првите верзии на приказните, колку што можев како дете од 11 години. Уште тогаш се појавуваат ликовите господинот Тикван Троглавест, тогаш mr. Pumpkin, и кралот Максимилијан. Подоцна при крајот на средното училиште и откако ги прочитав книгите на Рабле, Гаргантуа и Пантагруел се навратив одново на тој свет и на приказните, овој пат збогатени со нови ликови и со малку подобра нарација. Тогаш Хелоуинленд стана Земја Хелоувнска, демек малку поприспособена за нашите култура и јазик. Запишани во обична школска тетратка без линии, по многу години, овие приказни беа основата за оваа книга. Тука беа запишани приказните за Шумшумиште, Таклабас, Смолено Човече и Ципа Цапа, Крлушт кои, впрочем, во играта ги внесе брат ми, а јас во оваа книга им се навратив повторно и со малку поголема вештина и искуство ги склопив во нови приказни. Овој пат Земјата Хелоуинска претрпе промени и стана Чудновија, како едно заедничко место за сите фантастични суштества, некои измислени од мене, а некои превземени од бајките, фолклорот и митологијата, додека Хелоуинската област стана еден нејзин дел, со тоа правејќи идеално решение за да се оправдаат ликовите како Тикван Троглавест и Максимилијан и останатите тиквоглавци, а сето тоа да добие нов побајковит наратив и нов амбиент.

Размислував дали да ви кажам уште некои работи, но мудриот советодавец и секогаш во право, господин Тикван Троглавест, ми рече дека ова досега е сосем доволно, па затоа тука ќе го завршам овој текст, оваа кратка приказна за приказните“ вели Богдановски во предговорот на книгата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.