Театар за деца и младинци ја подготвува куклената претстава „Тоби“

Театарот за деца и младинци од Скопје ја подготвува детската куклена претстава „Тоби“ по текст на Флоријан Зденек, а во адаптација на текст и режија на Драгослав Тодоровиќ.

Овој пат „Театарот за деца и младинци“ подготвува навистина специфична бајка длабоко мотивирана од чисти хумани сфаќања.

– Постои нешто, особено кај младите, што изгледа како непремостива препрека, никако не сте задоволни од сопствениот изглед. Каква тага и горчина … Меѓутоа, ако имате, како јазовичарот Тоби, пријателка како госпоѓата Флора, вие многу брзо ќе ја надминете оваа безмислена грижа. Едноставно, со помош на пријателите ќе се видите себе си од еден сосема друг, среќен агол. Па, вие сте вешти , остроумни , а бога ми и многу згодни. И уште нешто, немојте да се китите со туѓи перја. Ќе излезете смешни – вели режисерот Драгослав Тодоровиќ.

И покрај овој суштински аспект на детската драма, во неа се читаат и откриваат навистина се уште актуелни проблеми кај луѓето: необјаснива желба за промена на сопствениот изглед, потоа дискриминација по најразлични основи, физички, социјални, расни итн. Во секој случај најважно е ние самите да бидеме среќни и да бидеме прифатени со она што го носиме, со она што имаме да го понудиме на овој свет. Публиката ќе може да види богати, ведри и духовито дизајнирани кукли кои ќе донесат многу свежина и игра во детските очи, најавуваат од ТДМ.

Креација на куклите, сценографијата и костимите се на Ирина Сомборац. Композитор е Виктор Апостоловски, а видеоанимација е на Емил Петро. Во претставата играат: Марија Ѓорѓијовска, Катарина Илиевска Силјановска, Винета Дамческа Мојаноска,  Ана Левајковиќ Бошков, и Мики Анчевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.