Средба Ахмети – Коѕијас: ДУИ го решава спорот со името, Иванов исклучен

Претседателот на ДУИ, Али Ахмети, денеска оствари средба со грчкиот министер за надворешни работи, Никос Коѕијас.

Претходно, Коѕијас се сретна со претседателот на Собранието, Талат Џафери, на што претходеа и одвоени средби со македонскиот министер за надворешни работи, Никола Димитров, и со премиерот Зоран Заев.

Коѕијас на средбите со Заев и Димитров изрази задоволство од досегашниот напредок во решавање на спорот за името. Конкретно, на оваа тема двајцата министри за надворешни работи ќе расправаат на 30 март во Виена, каде што ќе остварат заедничка средба со медијаторот Метју Нимиц, кој од двата нацрт-предлога на Грција и Македонија за името треба да направи еден, прифатлив за двете страни.

По завршувањето на средбата со Ахмети, грчкиот министер за надворешни работи ќе се сретне и со лидерот на ВМРО-ДПМНЕ, Христијан Мицкоски.

Од државниот врв, околу спорот со името, Коѕијас нема да се сретне само со претседателот Иванов, кој претходно кажа дека Владата од него го крие предлогот за решавање на спорот кој го пратиле до Грција.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.