Грчкиот претседател дециден: Прво промена на името и Уставот, па потоа потпишување договор

Прво треба да се направи промена на Уставот, па потоа да се потпише договор меѓу двете страни, рече претседателот на Грција Прокопис Павлопулос на средбата со неговиот португалски колега Марсело Ребело де Соуза.

Како што јави дописникот на МИА од Атина, на почетокот на средбата во претседателската палата, грчкиот претседател повторно говореше за трите отворени прашања во надворешната политика, за грчко – турските односи, кипарското прашање и спорот со името.

Објасни дека според него, на евентуалниот договор меѓу Македонија и Грција треба да му претходи уставна промена и потенцираше дека тоа не било грчко барање, туку барање „што се однесува на Европската унија, на европското законодавство и на почитувањето на тоа што генерално значи меѓународно законодавство“.

– Пред да стапи во сила договорот и пред да се комплетира содржината, потребно е да има претходна ревизија на Уставот на нашата соседна земја, на поранешната југословенска Република Македонија, затоа што, ние Европејците што го имаме овој демократски менталитет не можеме да замислиме дека една земја прифаќа, тоа треба да го направи и поради почитување на нејзиното уставно законодавство, не можеме да замислиме дека една земја, доаѓа и потпишува Меѓународен договор, се обврзува меѓународно, прекршувајќи го нејзиниот устав и велејќи: па не е толку важен нашиот Устав, можеме да одиме напред и ќе видиме кога ќе направиме ревизија на нашиот Уста, рече грчкиот претседател, додавајќи дека „како Европејци, го почитуваат самото демократско законодавство во рамките на поранешната југословенска Република Македонија“

Прокопис Павлопулос рече дека името треба да се реши на начин на кој ќе се почитува историјата, меѓународното право и европското законодавство.

– Ќе треба да се избере едно име и да постои соодветен договор од кој ќе произлегува дека постојат гаранции дека го исклучуваат иредентизмот, затоа што денешното уставно име на поранешната југословенска Република Македонија е име кое зрачи иредентизам, изјави претседателот на Грција, уште еднаш повторувајќи ги неговите ставови, овој пат пред неговиот португалски колега.

Прокопис Павлопулос додаде дека Грција ја поддржува европската и евро- атлантската перспектива на нашата земја, но само доколку претходно се реши прашањето со името, затоа што „Унијата не е простор за решавање на спорови“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.