Грците бараат спас во надуставна сила откако Заев го чепна нивниот устав

Идејата за отворање на грчкиот Устав, која ја изнесе премиерот Зоран Заев ја разбранува грчката јавност, предизвика негативни коментари, но ја отвори и опцијата за постигнување меѓународен надуставен договор.

– Идентитетот е чувство и за него не можете да преговарате, да се ценкате. Јас верувам дека во тој дух, водејќи се внимателно кон партнерите со кои преговараме ќе изнајдеме решение, а истовремено да се отвори и Уставот на Грција и да видиме како тие водат грижа за Грците надвор од Грција. Јас сум подготвен, како тие водат грижа за Грците надвор од Грција, така и ние да водиме грижа за Македонците надвор од Македонија, соодветно исто, рече Заев.

Заев: Да се отвори и Уставот на Грција

Според потпретседателот на Европскиот парламент и шеф на еврогрупата на СИРИЗА Димитрис Пападимуилис најдобриот начин за да се постигне решение за македонското прашање е да се стави крај Времената спогодба од 1995 со меѓународен договор со надуставна сила.

Како пример го наведе Лозанскиот договор.

– Најдобриот начин е со меѓународен договор со надуставна сила, со комплетни и обезбедени меѓународни гаранции како што е Лозанскиот договор (што не може никој да го смени) и ќе треба да се обезбедат две големи национални барања. Прво, сложено име, заемно прифатливо, ерга омнес, за сите употреби и второ, конечно напуштање на секаков вид на иредентизам. А иредентизмот да се замени со спогодба за пријателство и соработка меѓу двете земји, втемелена во стабилноста и неоспорувањето на постоечките граници, спогодба што ќе биде „заклучена во меѓународен договор, што ќе има гаранции и потпис од Европската унија, ОН, објасни Пападимулис.

Во однос на разговорите за името, Пападимулис смета дека треба да има повеќе преговори, а помалку интервјуа.

Грчките медиуми, пак како провокација ја оценија изјавата на Заев. „Провокација од Заев: И Грција да го отвори нејзиниот Устав“; „Заев: Промената на Уставот не е решение, го решивме иредентизмот“; „Провоцира Заев: Ненадејно поставува прашање за споредба на грчкиот со скопскиот Устав“; „Предлог од Заев за меѓународен договор наместо промена на Уставот на ПЈРМ- отвора прашање и за грчкиот Устав“; „Заев: Да го отвориме и Уставот на Грција“, се само дел од насловите во грчките медиуми.

Со став вчера излезе и Комунистичката партија на Грција (ККЕ). Партијата бара промена на Уставот сега, а не во далечна иднина, отстранување на иредентизмот и сложено име со географска одредница, ерга омнес.

Во однос на евентуален договор меѓу двете земји, ККЕ, во грчкиот Парламент нема да даде зелено светло.

– Комунистичката партија на Грција, нема шанси во Парламентот да гласа за никаков договор со Скопје, меѓу Ципрас и Заев, бидејќи овој договор ќе биде за Поранешната Југословенска Република Македонија во јули да се интегрира во НАТО, бидејќи овој договор ќе го има печатот на НАТО и на Европската унија. Затоа што овој договор нема да стави крај на иредентистичката пропаганда, на заемното признавање за неповредливоста на границите, на територијалниот интегритет и суверенитет на двете земји, на неопходните промени во Уставот на соседната земја, порача генералниот секретар на ККЕ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.