„Антолог“ го објави филмуваниот роман „Минатото“

Издавачката куќа „Антолог“ од Скопје го објави романот „Минатото“ од аргентинскиот писател Алан Паулс, добитник на наградата „Ералде“ во 2003 година. Преводот на македонски е на Огнена Никуљски.

Дали една љубов што траела долго време може некогаш да стане минато и колку иднината на тие луѓе може да се развива независно од нивното минато? Римини и Софија 12 години биле во врска што изгледала нераскинливо, но на крајот завршила. Сепак, минатото нè поврзува многу повеќе од тоа што сме свесни. Токму кога Римини помислува дека го открива прекрасниот свет на слободата и на новите желби, ќе најде нова љубов и ќе основа семејство. А тогаш во неговиот живот директно од времето за кое мислел дека е завршено се враќа Софија.

Секоја нова средба на двајцата главни протагонисти е изненадување сама по себе: љубовта од минатото добива нова форма во сегашноста. Дали Софија е жена полна љубов, пријател што сака да ја спаси својата најдрага личност или сè што прави прави со намера да се одмазди за разделбата, бидејќи не може да ги контролира страстите? Одговорот на ова прашање авторот вешто го одложува до целосно непредвидливиот крај.

Авторот истакнува дека Марсел Пруст и стенд-ап комичарот Џери Сајнфелд извршиле најголемо влијание врз неговата книга. „Минатото“ е најуспешниот роман на еден од најдобрите латиноамерикански писатели на својата генерација, според кој е снимен и филм во режија на Ектор Бабенко.

Книгата е објавена со поддршка на програмата „Сур“ на Министерството за надворешни работи и религија на Република Аргентина.

Алан Паулс (1959) e aргентински писател. Роден е во уметничко семејство со потекло од Германија. Завршил филолошки факултет и бил професор по теорија на книжевноста. Работел како новинар, потоа и во една киносала. На тринаесетгодишна возраст почнува да пишува под влијание на Реј Бредбери, а подоцна и на Кортасар и на Кафка. Како автор користи експериментален стил што игра со формата и со јазикот, придружен со црн хумор и со флуидна нарација.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.