Влада: Архивскиот материјал во Државниот архив не е оштетен од последата поплава

Архивскиот материјал во зградата на Државниот архив не е оштетен, утврди комисија составена од претставници од Влада на РМ, Архив на РМ и Јавно обвинителство.

На барање на министерката без ресор задолжена за странски инвестиции Зорица Апостолска беше извршен увид во Државниот архив. Во увидот учествуваа и секретарот на Јавното обвинителство, Митко Митревски и заменик-директорот на Државен архив, Музафер Бислими со својот стручен тим.

„Комисијата, предводена од министерката Зорица Апостолска констатираше дека дел од архивскиот материјал од прва категорија, од најголемо национално и историско значење, освен во просториите на новото, се наоѓа и во старото депо. За време на увидот е констатирано дека во новата зграда на архивот архивскиот материјал не е оштетен од неодамнешните поплавувања на објектот, ниту пак директно е загрозен и дека е целосно заштитен во непропустливи метални сефови. Дополнително од увидот е заклучено дека има потреба да се направи дополнителна проценка на состојбата на микрофилмуваниот архивски материјал, со цел да се утврди дали има потреба од негово преместување во старото депо. Со увидот е констатирано дека е потребна итна санација на  покривот на зградата, со што ќе се спречат понатамошни поплавувања на објектот“, пишува во соопштениот испратено од прес-службата на Владата.

Владата на Република Македонија го повторува ставот дека наскоро ќе се донесе конечна одлука во насока на трајно решение околу наследената ситуација со зградата на архивот и нејзината комплетна нефункционалност.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.