Коѕијас ќе слета на „Александар Македонски“ штом ќе стане „Скопје“

По промената на името на скопскиот аеродром, грчките медиуми не ја исклучуваат можноста шефот на грчката дипломатија Никос Коѕијас да го посети Скопје.

– Во случај да се направат овие симболични чекори, не треба да се исклучи можноста министерот за надворешни работи на Грција, Никос Коѕијас, набргу авионски, да замине за Скопје, со директен лет од Атина, прв по многу години, пишува грчкиот весник „Катимерини“, а со сличен коментар е и онлајн изданието на весникот „Прото тема“, објавувајќи дека шефот на грчката дипломатија „ги подготвува куферите за Скопје“.

– Коѕијас се подготвува за патување во ПЈРМ по промената на името на аеродромот, наведува „Прото тема“.

Како што јавува дописникот на МИА од Атина, според медиумите во Грција, во изминатиот период Никос Коѕијас, изразил желба да биде првиот кој од Атина, авионски би дошол во Скопје, доколку и во пракса се спроведат најавите на македонскиот премиер од Давос за преименување на аеродромот и автопатот. Сепак, за оваа информација не постои официјална потврда.

Останува отворено прашањето дали евентуалното патување од Атина во Скопје, би било со грчки владин авион или пак со лет на грчката компанија Aegean airlines, која пред четири месеци, официјално најави дека Скопје е една од новите дестинации што се воведуваат во 2018 за директни летови од Атина

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.