Ставот на Нимиц разочарува во однос на прашањето за името и неговата улога како посредник одговорен пред Обединетите нации. Ова го изјави за проектот „ Сите за и околу Македонија“ со Слободан Томиќ, поранешниот медијатор во грчко македонскиот спор Робин О`Нил кој објаснува:
– Позицијата на Грчката влада по последниот пакет предлози од Нимиц не е јасна. Ќе ве потсетам на крајот од мојата мисија во 1992 година, потенцира О`Нил и додава:
– Претседателот Глигоров рече дека е подготвен името “Република Македонија (Скопје)“ да го стави на референдум пред Македонскиот народ ако Грција го прифати тоа име како решение за спорот околу името, истакнува тој.
– Грција одби согласност на секое име што го вклучува зборот Македонија. Нимиц сега предложи четири имиња, а сите го содржат зборот Македонија. Ако на Македонската влада не и’ се допаѓа некое од овие предложени имиња, или сите од нив, тоа едноставно треба да го каже, вели О`Нил.
Тој предупредува дека дури и ако Македонската влада е подготвена да прифати некое од предлозите на Нимиц, одлуката ќе зависи од Македонскиот народ и ќе биде неопходен референдум за промена на Уставот.
– Јас не би се согласил да ставам ново име на референдум без гаранција од Грција дека ќе го прифати, ако биде одобрено на референдум, како трајно решение на прашањето за името притоа поддржувајќи го влезот на Македонија во НАТО и Европската Унија. Пред неколку години кажав дека му се восхитувам на работата на Нимиц како медијатор, на трпението што го покажа низ сите овие години. Но, не верувам дека прашањето за името може да се реши со посредување, бидејќи нема вистинска подготвеност за компромис, дополнува поранешниот медијатор во грчко – македонскиот спор Робин О Нил.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
