Министерството за здравство демантира дека од Гинекологија исчезнало бебе

Министерството за здравство вечерва преку соопштение ги отфрли како неточни информациите пласирани во јавноста дека исчезнало бебе на Клиниката за гинекологија.

„Министерството ја информира јавноста дека бебето и мајката се на Клиниката за гинекологија и нивната здравствена состојба е добра. Истовремено, сакаме да информираме дека е поднесена пријава до МВР за насилно однесување против семејството на родилката“, стои во соопштението.

Дел од медиумите попладнево објавија изјава на татко кој тврдеше дека од Клиниката за гинекологија во Скопје исчезнало неговото женско новороденче. Според неговите кажувања, бебето што го видел вчера по раѓањето, не е истото што му било покажано денеска, затоа што денес било означено со погрешно презиме. Токму поради тоа, кај родителот се отвориле сомнежи дека тоа новороденче не е неговата ќерка.

Претходно, во врска со настанот, од Министерството за внатрешни работи информираа дека до нив биле поднесени две пријави. Како што наведоа оттаму, едната е од родителот кој пријавил дека неговото дете било заменето, а другата од клиниката од каде што пријавиле дека тој се однесувал дрско и недолично кон персоналот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.