Во миг престана да чука срцето на Перо Атанасов – Црна Стрела

58-годишниот Перо Атанасов од Скопје починал откако паднал во бесознание додека вчера планинарел во месноста „Антени“ на Попова Шапка.

Неговите пријатели денеска се простуваат од него со голема жал и тага.

„На вчерашниот прекрасен ден, на прекрасните временски и сончеви услови дел од нашиот тим по зимската патека ги искачи Син Врв, Бакардан и Титов Врв (Шар). И токму во сите моменти на задоволство, среќа, радост, бескрајно убави разговори за животни случки, за Македонија, најразноразни откачени шеги, сончање, лесен чекор со добро врзани дерези и гамашни, на враќање на рамнината на Син Врв (кај самите Антени) во миг престана да чука срцето на ПЕРО АТАНАСОВ – ЦРНА СТРЕЛА!

Човек – планина, бескрајно добар пријател, извонредно искусен планинар и алпинист, вљубеник во природата, одличен познавач на врвовите, планините, сопруг, татко, дедо.

На денот кога ги видовме сите планински масиви на Македонија и Балканот, денот кога со лесен од по зимската патека во „(про)летни“ услови ги направивме најубавите слики од овие наши врвови, но и од нас самите, и кога Перо ни рече: „вие сте Црни Стрели“, во миг не напушти Перо Атанасов, со кого лани од Дренок ја бележевме патеката и во чија чест ќе биде врв 11/12: Радуч на Јабланица.

Вечна слава и спомен за ПЕРО АТАНАСОВ – ЦРНА СТРЕЛА“

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.