МОН ги кани наставниците да дадат предлози за новите наставни програми

Министерството за образование (МОН) ги кани наставниците да ги коментираат или дадат нови предлози за новите наставни програми.

Преку соопштение Министерството и со желба да се креира “што е можно подобар и поквалитетен образовен модел”, сака да го чуе “гласот и мислењето на лицата кои секојдневно се вклучени во образовниот процес, наставниците”.

“За таа цел, Министерството за образование и наука бара и очекува од наставниците од одделенската настава, како и сите компетентни и заинтересирани лица, активно да се вклучат во процесот на градењето на новиот модел за основно образование и да достават свои критики, коментари и предлози за подобрување на новите наставни програми и реформите во основното образование.

 За да обезбедиме квалитетен ран детски развој и да изградиме ефикасен и ефективен воспитно образовен систем со добра и силна основа, кој пред сè ќе биде цврст, безбеден и отпорен на разни промени и потреси, потребно ни е здраво и цврсто основно образование. Во таа насока, создаваме нов образовен модел за основно образование и нови и квалитетни наставни планови и програми за учениците од 1-3 одделение”. се вели во соопштението.

Работната група што работи на новиот модел се состои од експерти во областа, професори од Филозофскиот факултет и Педагошкиот институт, но и практичари во областа, односно наставници кои работат со ученици од 1-3 одделение. Новиот образовен модел, го засега, и се однесува на работата на наставниот кадар.

“Вашите коментари и предлози се добредојдени и ги очекуваме на [email protected], а можете истите да ги доставите и до архивата на Министерството за образование и наука (ул. Св. Кирил и Методиј бр. 54). Наскоро очекуваме да ги добиеме и новите наставни програми за второ и трето одделение”, порачува МОН.

Наставните програми за прво одделение можете да ги преземете тука.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.