Ветувањата на Богдановиќ паднаа на Уставен

Уставниот суд донесе одлука за поништување на одлуката на Општина Центар за поништување на четири урбанистички планови која беше донесена лани во март со образложение дека Општината немала право да поништува планови, туку само да носи нови во кои ќе има измени. Со оваа одлука на Уставниот суд остануваат Шпанските скали на Плоштад Македонија, катната гаража кај „Авто Македонија“ и улицата на „Кеј 13 Ноември“.

„Уставниот суд може да поништува и да укинува детални урбанистички планови. Општините имаат овластувања да донесуваат урбанистички планови, а доколку сметаат дека некои од нив не се во ред, тогаш општинските власти можат да ги менуваат ДУП-овите“, стои во одлуката на Уставен суд.

Поништени се деталните урбанистички планови Голем Ринг – Јужен дел – Запад, Централно зеленило покрај река Вардар – Јужен дел, Централно градско подрачје – Мал Ринг и Голем ринг – Јужен дел – Исток.

Одлуката на Уставен суд со која во сила се враќа урбанистичкиот план „Мал ринг“ изгласан во 2012 година, до март годинава нема да влијае на градењето во Центар. Од Општината потсетуваат дека до март во сила е мораториумот за градење на територијата на целата општина.

„Во моментот има мораториумот за градење кој забранува појава на нови градби. Забраната истекува во март, но до тогаш очекуваме да заврши ревизијата на постојните планови. Анализите треба да покажат кои планови ќе се менуваат делумно, а кои целосно поради тоа што многу од нив се донесени на ноќни седници, без да се земе предвид мислењето на граѓаните, а и има и ред други забелешки. Во подготовката и носењето на новите планови ќе бидат вклучени граѓаните и ќе бидат запазени сите постапки“, велат од Општина Центар.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.