Два нови случаи на морбили, грипот сѐ уште е со ниска активност

Шестмесечно бебе од Куманово и 40- годишен маж од Скопје заразени од мали сипаници. Поради возраста, бебето сѐ уште не било вакцинирано. Хоспитализирано е со тешка клиничка слика, но сега е во подобра здравствена состојба. Мажот, пак, бил вакциниран само со една доза, а по амбулантскиот преглед е пуштен на домашно лекување.

Надлежните велат дека нема епидемиолошка поврзаност на двата случаја, а не ја исклучуваат можноста морбилите да се внесени од соседството или од други европски земји каде што има епидемија. Апелираат на редовна вакцинација.

„Не е мала можноста, вирусот да е импортиран, внесен. Имаме силни трговски врски со соседните земји, многу наши луѓе патуваат во Србија, Грција, Бугарија, па и во Европа, каде можат да бидат заразени и да го донесат заболувањето кое потоа можат да го пренесат во околината на некој што не е имунизиран. Епидемиолошката ситуација се отсликува со актуелната ситуација што е сега и за жал очекуваме и понатаму доколку не се подобри состојбата да имаме се поголем број заболени па дури и смртни завршетоци“, вели д-р Гордана Кузмановка, епидемиолог.

Надлежните велат дека состојбата со грипот сѐ уште не е алармантна. Сепак, на детската клиника „Козле“ веќе се полни сите капацитети. Со почетокот на второто полугодие се очекува да се зголемува бројот на новозаболени.

„Престојната сезона е сезона на вируси, можеме да го очекуваме и грипот, самото присуство на децата во затворени средини, во училиштата циркулираат вирусите. Во моментов имаме 96 хоспитализирани деца, тоа на некој начин е полн капацитет на болницата. Но, постојано се отпишуваат се впишуваат нови деца гледаме целата ситуација да биде под контрола“, изјави д-р Анѓелко Андоновски, директор на детската клиника „Козле“.

Од државниот санитарен и здравствен инспекторат испратиле решение до сите основни и средни училишта за дезинфицирање на просториите, како и редовно да се следи отсуството на децата од настава.

Извор: МТВ

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.