Британскиот Дом на лордови: На Западен Балкан зајакнуваат авторитарни лидери и националистички политики

Во земјите од Западен Балкан зајакнуваат авторитарни лидери и националистички политики, оцени горниот дом на британскиот Парламент. Домот на лордовите изразува длабока загриженост дека западнобалканските земји тонат кон авторитаризам и дека стабилноста на регионот е поткопана од странски земји, како Русија.

Тие во документот насловен „Обединетото Кралство и иднината на Западниот Балкан“ изразуваат сериозна загриженсот дека постои опасност од губење на придобивките постагните во доброто владеење и градењето на правната држава. Според документот земјите се соочуваат со авторитарни раководства, националистички политики и заробени држави.

– Тоа влошување е видливо и во загриженоста на меѓународната заедница поради овие тенденции, како и од ендемскиот организиран криминал и корупцијата во регионот. Стабилноста на регионот, исто така, е поткопана и од влијанието на трети земји, се додава во извештајот.

Приближувањето на балканските земји кон ЕУ е значајно во остварувањето напредок во борбата против корупцијата, зајакнување на владеење на правото и слободата на говор, како и за спроведување на останатите реформи.

– Иако надвор од ЕУ, Велика Британија ќе остане клучен пријател на земјите од регионот. (Британската) Влада треба јасно да каже кога земјите во регионот не ги исполнуваат бараните вредности и стандарди и да го искористи своето влијание за да бидат согледани недостатоците, се нагласува во Извештајот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.