Агенцијата за храна и ветеринарство информира дека досега нема добиено нотификација дека на македонскиот пазар се пласирани небезбедни количини млеко и над 600 млечни производи на компанијата „Лакталис“ и дека инспекциските служби вршат контрола кај компанијата која ги увезува овие производи во Република Македонија.
„Како контакт точка за Системот за брзо предупредување за храна и храна за животни на Европската Унија, АХВ досега нема добиено нотификација дека на македонскиот пазар се пласирани небезбедни количини млеко и над 600 млечни производи на компанијата „Лакталис“ за кои француската влада соопштила дека се повлекуваат од продажба поради стравување дека постои опасност тие да се заразени со салмонела“, се наведува во соопштението на АХВ.
АХВ информира дека од почетокот на годинава досега од „Лакталис“ во Република Македонија увезени се 103.4 тони млеко и млечни производи, од нивни објекти во Словенија, Хрватска, Босна и Херцеговина, како и од соседна Србија и Германија. Од објектите на оваа компанија во Франција, годинава увезени биле само 2.4 тони млечен производ топено сирење.
„Производите од оваа компанија, како и од останатите производители кои се увезуваат во земјава се контролираат од страна на официјалните ветеринари на Агенцијата при увоз, при истовар и во прометот. Во ноември годинава, земени и испитани беа мостри од сирење од овој производител од објектот во Република Србија и истите беа негативни, односно во нив не е утврдено присуство на салмонела“, соопшти АХВ.
АХВ уверува дека како одговорна институција за безбедноста на храната, ја следи состојбата и доколку се јави потреба навремено ќе реагира со преземање на соодветни мерки.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
