Собранието е на ред да расправа за одеземање на имунитетот на шесте пратеници

Собранието на Република Македонија денеска ќе ја одржи 25. седница накоја единствена точка на дневниот ред ќе биде симнување на имунитетот на шесте пратеници од коалицијата на ВМРО-ДПМНЕ поради притвор за настаните на 27 април во Парламентот. За симнување на имунитетот потребно е просто мнозинство, односно 61 глас.

Со ова ќе заврши постапката предвидена со Деловникот на Собранието и Уставот за симнување на пратеничкиот имунитет на Крсто Мукоски, Јохан Тарчуловски, Жаклина Пешевска, Љубен Арнаудовски, Љупчо Димовски и Сашо Василевски.

Собранието дури и да им го симне имунитетот на пратениците, според македонската легислатива и Уставот, ќе останат на пратеничката функција се додека евентуалната пресуда на Кривичниот суд не стане правосилна и ако пратеникот е осуден за кривично дело за кое е пропишана казна затвор во траење од најмалку пет години.

Талат Џафери ја закажа седницата откако Комисијата за деловничко и мандатно-имунитетни прашања со поединечно гласање одлучи да им го симне имунитетот на пратениците. На седницата не присуствуваа народните избраници од пратеничката група на ВМРО-ДПМНЕ и пратениците за чиј имунитет се расправаше, а се членови на Комисијата – Мукоски и Тарчуловски.

Единствен кој се обрати на седницата беше пратеникот Александар Кирацовски од СДСМ, кој кусо оцени дека настаните од 27 април биле напад врз демократијата и уставниот поредок на земјата и обид за загрозување на животот на пратениците од тогашната опозиција. Институциите на Република Македонија, според него, имаат целосен кредибилитет, должност и одговорност до крај да го расчистат овој случај за правдата конечно да излезе на виделина и кривичните дела од ваков карактер никогаш да не се повторат.  Ситуацијата, додаде тој, е многу чиста, фактите се очигледни, аргументите се поголеми од сите нас.

Пратеничката група на ВМРО-ДПМНЕ се огласи со соопштение во кое наведува дека одлуката на Комисијата за деловничко и мандатно и имунитетни прашања не е базирана на факти и аргументи, туку на желбата за политички реваншизам на СДСМ и кон пратениците на ВМРО-ДПМНЕ и коалицијата, но и кон многу граѓани.

Комисијата за деловнички и мандатно-имунитетни прашања, според нив, го премолче и го аминуваше прекршувањето на Уставот и Деловникот за работа на Собранието.

Шесте пратеници се дел од 36-те лица кои Основното јавно обвинителство ги гони за „терористичко загрозување на уставниот поредок и безбедноста“, во врска со настаните од 27 април годинава во Собранието на Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.