Американскиот претседател Доналд Трамп пожнеа критики поради ретвитнувањето на наводно исламофобски видеа, меѓу другите и од Тереза Меј. Но, тој не ѝ остана должен и ја нападна со лута порака.
Откако британската премиерка го критикуваше поради споделувањето антимуслимански видеа преку Твитер, американскиот претседател Доналд Трамп остро ѝ одговори: Тереза Меј не треба да се концентрира на него, туку на „уништувачкиот радикален исламски тероризам“ во Велика Британија, напиша тој на Твитер.
Портпарол на Меј вчера, револтиран што Трамп без коментари сподели три видеа на кои се прикажуваат деликтите кои ги прават муслиманите во Велика Британија, постирани од Џејда Франсен, заменик-шеф на десничарската група „Британија на прво место“, реагираше дека „постапката на американскиот претседател е погрешна.“
„‘Британија на прво место‘ сака да го подели општеството со својот говор на омраза, ширејќи лаги и тензија. Британскиот народ ја отфрлува оваа реторика“, порача портпаролот на Меј.
Видеата веќе подолго време се на интернет. Во едно од видеата наводно се гледа како група муслимани туркаат момче од покрив. Друго видео посочува дека еден муслиман крши статуа на девица Марија, а во трето, муслимански емигрант, наводно, удира момче во Холандија. Веродостојноста на последното видео веднаш беше оспорена, бидејќи холандската полиција и медиумите никогаш не сугерирале дека напаѓачот е муслиман.
Џејда Франсен пак му се заблагодари на Трамп: „Бог да Ве чува, Трамп! Бог да ја чува Америка“. Франсен е позната по своите антимуслимански ставови и е осудувана за напад врз муслиманка.
Белата куќа се обиде да го оправда ретвитнувањето од страна на Трамп: „Постои реална закана и тоа е она што претседателот сакаше да го истакне,“ изјави портпаролката на Трамп.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
