Вељаноски со писмо до пратениците: Треба да се засрамиме пред довербата која ни ја дале граѓаните

Поранешен претседател на македонското Собрание и актуелен пратеник Трајко Вељаноски денеска преку писмо реагира на, како што вели, непочитувањето и кршењето на Деловникот за работа на Парламентот.

Осврнувајќи се на денешната закажана собраниска седница за пратенички прашања, Вељаноски посочува дека ваква седница се свикува два дена пред нејзиното одржување и оценува дека таа е преседан во работењето на законодавниот дом бидејќи во ист ден свикани се уште две други собраниски седници и две седници на собраниските тела.

– Седницата за пратенички прашања што е пред нас е своевиден преседан во работењето на законодавниот дом и од уште еден аспект. Во ист ден во кој е свикана седница за пратенички прашања свикани се и уште две други седници на Собранието и уште две други седници на работните тела. Тоа никогаш претходно не се случило, и не смее да се случува, вели Вељаноски во отвореното писмо.

Според него, се злоупотребува членот 68 став 2 и скоро сите собраниски седници се прикажуваат како итни, односно од 21 седница на Парламентот, 16 се свикани по овој член. Собраниските седници, како што посочува Вељаноски, се свикуваат од денес за утре со цел да се избегне доставата на материјали и да се оневозможи пратениците да се подготват за дебата.

Тој има забелешки и за роковите за амандманска расправа, за постапките за интерпелација, за однесувањето на претседателот на Комисијата за европски прашања кој ја одложи на неопределено време, за поднесување на амандманите, како и за настојувањето да биде донесена предлог-одлуката за заменици-генерални секретари на Собранието.

Непочитувањето и кршењето на Уставот и на Деловникот за работа Собранието, според Вељаноски, почнало уште од изборот на претседател на Собранието на 27 април годинава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.