Утре ќе се бираат новите полициски возила

За утре е закажана електронската аукција за постапката за доделување на договор за јавна набавка по огласот 17-19/2013 за набавка на 100 возила во полициска изведба.

На јавниот тендер објавен од МВР понуди доставија четири компании. Автонова со возило “Цитроен Ц1Х“, Еуроимпекс со “Пежо 107“; Порше Македонија со „Шкода Сити Гоу“ и Авто Македонија со “Шевролет спарк“.

Од МВР информираат дека Комисијата за јавни набавки при МВР ја заврши евалуацијата на пристигнатите понуди по што сега следи електронската аукција.

Според информациите сите четири компании доставиле уредна документација, што значи дека на утрешната е-аукција ќе учествуваат сите поднесувачи.

Понудите се движат севкупно од 46.906.700 денари до 65.800.000 денари, а во цената, освен вредноста на автомобилите вкалкулирана е полициска изведба на истите, односно четири резервни гуми, сигнален уред за звучна и светлосна сигнализација, како и сервисирање на возилата за наредните три години додека трае договорот.

Како што МВР веќе претходно информираше единствен услов е цената на која отпаѓаат сите бодови, односно јавната набавка ќе му припадне на оној понудувач кој што ќе конкурира со најниска цена на електронската аукција. Плаќањето е предвидено да биде на 36 месечени рати во текот на важноста на договорот, при услови со 0% учество при купување на возилата. Првата рата на исплата на возилата ќе биде во рок од 30 дена од целосната испорака на возилата. Се бара рокот на испорака да биде не подолг од 90 дена од склучување на договорот, со место на испорака во Скопје во објект на МВР.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.