Дали луѓе од тимот на Доналд Трамп имаат врска со евентуално влијание на Русија врз американските избори? Во рамки на истрагата наскоро може да се очекуваат и први апсења, јавуваат американските медиуми.
Поротниците во еден суд во Вашингтон, на барање на специјалниот иследник Роберт Милер (на фотографијата), дале дозвола за покревање први обвиненија, јави телевизијата Си-Ен-Ен. Обвиненијата би можеле да добведат до апсења веќе во понеделник, тврди медиумот, не наведувајќи други детали. За ова пишува и „Волстрит Журнал“. Останува нејасно против кого Милер сака да покрене обвинение и како точно гласат обвинувањата на сметка на обвинетите.
Милер води истрага поради наводни нелегални контакти со Русија од страна на изборниот тим на американскиот претседател Доналд Трамп, како и поради сомневања за руски хакерски напади во полза на Трамп. Според американските медиуми, специјалниот иследник се интересирал и за околностите кои довеле до отпуштање на првиот советник на Трамп за национална безбедност, Мајкл Флин, како и на поранешниот шеф на ФБИ, Џејмс Коми.
Трамп го отпушти Коми на почетокот на мај, а подоцна отказот го доведе во врска со истрагата за руските врски. По отказот за Коми, Министерството за правда на САД го назначи Роберт Милер за специјален иследник.
Милер во рамките на истрагата иницираше создавање Голема порота, која заседава тајно, може да собира доказен материјал, да сослушува сведоци под заклетва и, како што сега тврди Си-Ен-Ен, да покренува обвиненија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
