Жената која е побогата од Роналдо и Ѓоковиќ (Фото)

Угледниот магазин „Форбс“ објави листа на славни личности од Европа со најголема заработка, меѓу кои се најдоа писателката Џ. К. Роулинг, фудбалерот Кристијано Роналдо и тенисерот Новак Ѓоковиќ.

Новата листа на „Форбс“ ја предводи креаторката на Хари Потер, Џ. К. Роулинг, која во последните 12 месеци заработила околу 95 милиони долари без данок и други трошоци, според процените.

Најплатените 20 славни Европејци заедно заработиле повеќе од милијарда долари за една година. Дванаесет од нив се од Британија, а Германија, Ирска, Холандија, Португалија, Србија, Шпанија, Шведска и Швајцарија имаат по еден претставник.

Спортисти

Секако, меѓу славните од стариот континент со најголема заработка се најдоа низа спортисти – тројца фудбалери, тројца возачи, двајца тенисери, еден голфер и еден натпреварувач во мешани боречки вештини.

Португалецот Кристијано Роналдо го зазема второто место на престижната листа со заработка од 93 милиони долари, додека на пример, борачот Конор Мекгрегор, кој е на претпоследно место, имал заработка од 34 милиони долари.

Српскиот тенисер Новак Ѓоковиќ е на 15-тото место на листата со процена дека заработува 37,6 милиони долари. Со тоа се најде пред музичарот Ед Ширан, возачот на Формула 1 Фернандо Алонсо, фудбалерите Герет Бејл, Конор Мекгрегор и Златан Ибрахимовиќ, кој заврши на последната, дваесетта позиција со заработка од 32 милиони долари. Ибрахимовиќ лани лансира сопствен спортски бренд.
Колегата на Ѓоковиќ, Роџер Федерер, има заработка од 64 милиони долари и е на петтата позиција на листата.

Музичари

Од музичарите, пак, има и двајца диџеи на листата – 48-годишниот Тиесто, чија заработка изнесува 39 милиони долари и Шкотот Калвин Харис.

На 12-то место е музичкиот могул Сајмон Кауел со 43,5 милиони долари.

Пол Макартни е на осмата позиција со заработка од 54 милиони долари. Со неговите 74 години, Пол е најстариот член на „Селебрити 100“, но сè уште еден од најактивните. Елтон Џон е на шесто место со 60 милиони долари.

Готвач меѓу најплатените

На листата на „Форбс“ се најде и еден готвач – Гордон Ремзи, кој од договорите за неговите кулинарски шоуа заработил 60 милиони долари.

Жени

Меѓу дваесетте најплатени европски познати личности се најдоа само две жени. Освен писателката Роулинг, која е на првата позиција според заработувачката во изминатите 12 месеци, на листата претставничка од женскиот пол е и британската пејачка Адел. Пејачката се најде на четвртото место на листата со заработка од 69 милиони долари.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.