Тилевски: Враќање на автентичноста и сјајот на Охридската чаршија

Охрид претставува лулка на културните, традиционалните, историските и религиски вредности. Охрид е белег на македонската култура, додека пак за Охрид, траен белег е Чаршијата. Затоа со проект ќе се изработи стратегија и акциски план за реконструкција и замена на дограмата со традиционални излози во охридската чаршија, најави денеска Митко Тилевски, кандидатот за градоначалник на ВМРО-ДПМНЕ.

– Целта на проектот е враќање на автентичноста и сјајот на Охридската чаршија, преку изготвување на идејни решенија, стандарди и правилници за уредување на угостителски тераси, тенди, дуќани и излози и замена на постојните алуминиумски и пластични разнобојни дограми и излози со традициоанална висококвалитетна дограма, изјави тој.

Тилевски уште најави типизирани тезги, псставени на строго определени локации на градот, рекламни билборди со фотографии од стар Охрид.

– Изобилството на стари автентични фотографии со локации од Охрид од минатото е одлична можност за привлекување на вниманието не само на туристите туку и на граѓаните на Охрид, со цел враќање во времето низ еден визуелен времеплов и согледување на самата еволуција на градот. Билбордите ќе се постават на повеќе локации од градот со автентични фотографии како сведоштво за изгледот на градот во минатото, рече тој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.