„Чиј е мојот град” – изложба на Антонио Аранѓеловиќ во Музеј на град Скопје

Во вторник (19 септември) со почеток во 20 часот, во Музејот на град Скопје, ќе се отвори изложбата на академскиот уметник Антонио Аранѓелоиќ.

Изложбата „Чиј е мојот град?“ на Антонио Аранѓеловиќ е во организација на Центарот за промоција на култура и туризам. На самата изложба ќе бидат изложени триесеттина дела на овој млад автор.

Антонио Аранѓеловиќ е роден во Скопје, во 1986 година. Завршува средно уметничко училиште “Лазар Личеновски” на отсекот Графика во Скопје во 2004. На Ликовната Академија во Скопје се запишува во 2006 година, а дипломира во 2010 на отсекот Графика во kласата на Проф. М-р Мирко Вујисиќ. Во 2011 се запишува на постдипломски студии на Ликовната Академија во Скопје во област Графика кај Проф. м-р Мирко Вујисиќ. Магистрира во Мај, 2014 со магистерскиот труд ,,Куќичка на дрво”.

Од најрана возраст твори успешно во повеќе уметнички медиуми како што се ликовната уметност, стрипот, музиката, графичкиот дизајн и анимацијата. Во полето на ликовната уметност досега има остварено две самостојни изложби, првата во 2011 во Младинскиот Културен Центар каде беа изложени 28 дела (графики, цртежи и слики), а втората во Графичкото студио во Музејот на Град Скопје каде беа изложени 10 традиционални графики. Во полето на стрипот досега има издадено 3 изданија заедно со својот стрип партнер, Филип Алексовски. Станува збор за трите продолженија на сега веќе култниот стрип насловен ФАЦИЗАМ.

Во полето на музиката е познат како ТОНИО САН кое подоцна му станува уметничко име во сите области и уметнички и творечки медиуми, член е на култната хип хоп групација ЛЕГИЈАТА и дел од триото ГРИН АУТ (GREEN OUT) . Досега има издадено три соло албуми, два со својот бенд ГРИН АУТ, два албуми со ЛЕГИЈАТА и еден во коалиција со КЕМП О.Д.

– Изложбата претставува збир на цртежи и графички листови во различни техники кои се дел на неговиот долгогодишен творечки опус, а своевиден континуитет на она што го работи во сферата на хип хоп музиката и стрипот. Оваа изложба е доказ за творечката широчината која Антонио ја има, но и потврда за неговиот севкупен потенцијал како уметник”, пишува организаторот на изложбата Александар Ристевски од ЦПКТ.

– На изложбата насловена „Чиј е мојот град?”, Антонио Аранѓеловиќ прикажува цртежи и графички листови изведени во различни традиционални и комбинирани техники, при што хартијата е обединувачки носител на медиумот. Во ликовниот јазик со кој комуницира авторот, доминира сигурниот и снажен цртеж, препознатлив во суптилните тенки исцртувачки линии, но и во широките енергични потези кои го поставуваат пејзажот. Еднакво доминантна, покрај цртежот, е и графичката текстура која авторот ја создава со длабоко чувство за исклучителна естетска вредност. Во делата на Аранѓеловиќ се создава еден нов универзум на испреплетени случувања и напластена реалност. Преку навидум едноставна и лесна нарација тој ни ја претставува дуалноста на оваа природа, отворено спротивставувајќи ја надворешната форма со внатрешната: скриена и суштинска”, вели за авторот, Марија Ветероска.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.