Германската компанија „ОДВ Електрик“ вчера во Технолошко индустриската зона Охрид/Струга кај Мислешево ја отвори новоизградената фабрика за производство на електронски компоненти за автомобилската индустрија.
Станува збор за гринфилд инвестиција во вредност од три милиони евра, во кој функционираат седум производствени линии со вкупно 220 вработени.
Инвестицијата на ОДВ Електрик во зоната Охрид- Струга, започна да се гради кон крајот на 2015-та година, напиша на својот ФБ профил лидерот на ВМРО-ДПМНЕ, Никола Груевски, по повод отварањето на фабриката.
– Се сеќавам дека имавме долги преговори со преставниците на германскиот бренд во автомобилската индустрија ОДВ Електрик кои финишираа во Битола во хотелот Епинал 2014 година. Тоа беше период кога бевме во екот на изборната кампања одејќи од град во град и од село во село. Виктор Мизо кој ги водеше преговорите замоли за мое вклучување во момент кој оцени дека е многу важен за исходот на разговорите. Тогаш, со обзир дека имав митинзи во Битола и регионот ги замолив да дојдат таму. Накратко ги прекинав моите изборни активности, седнавме во Епинал и се заврши како што посакувавме. Час и половина подоцна преставникот на ОДВ даде јавна изјава дека следната нивна инвестиција ќе биде токму во Македонија, во зоната Охрид- Струга и дека планираат да изградат фабрика каде во неколку години ќе вработат околу 1000 луѓе. Бев многу среќен бидејќи тоа ни беше прва договорена поголема инвестиција во регионот на Охрид- Струга- напиша Груевски.
– Денес откако веќе година и пол ОДВ Електрик работи во изнајмен објект и веќе вработува над 200 лица, се пушта во употреба новата фабрика во зоната, и прва таму. Нивни соседи ќе бидат германскиот Костал кој веќе вработува над 140 лица во поранешните простории на ЕМО во Охрид и планира да дојде до 1000 работни места делумно во тие простории, а делумно во нов објект во зоната. Денес сум уште посреќен кога и официјално почнува со работа фабриката во ТИРЗ Охрид-Струга. ОДВ производува кабли и електрични инсталации за автомобилски брендови како Порше, Мерцедес, БМВ Фолсваген, напиша Груевски.
Инвестиција е од 5 милиони евра во новиот производствен погон во Зоната, на површина од 4 ипол илјади метри квадратни. Подоцна се планира негово проширување на површина од 9 илјади метри квадратни со целокупната вредност на инвестицијата од 15 милиони евра.
– ОДВ Eлктрик и Костал, нема да значат само над 2000 нови вработувања, туку и многу повеќе од тоа. Ќе има и многу индиректни вработивања, пренос на знаење и технологии, но пред се ОДВ и Костал се нова иднина за Охрид, Струга, Дебрца и Вевчани. Нова шанса и нова можност за многу луѓе, нова надеж и нови перспективи за граѓаните и целиот регион- напиша Груевски.
Мартин Ехрет, главниот извршен директор на „ОДВ Електрик“ во обраќањето пред присутните на свеченоста појасни дека покрај во изградбата на објектот вложени се и 1,7 милиони евра во опрема, од која голем дел произведена во филијалата на компанијата во Украина.
Тој најави дека во блиска иднина „ОДВ Електрик“ планира реализација на дополнителни два важни проекти што предвидуваат нови процеси и предзивици, а за кои рече дека ќе го потврдат стратешкото значење на денеска отворениот производствен погон за самата компанија.
– До крајот на 2017 година ќе бидеме околу 250 колешки и колеги, а до крајот на 2018 ќе бидат вработени околу 300 соработнички и соработници. Ова ја покажува целата динамика на „ОДВ“, но исто така и неопходноста од дополнителни квалификувани колешки и колеги од Македонија. Како инвеститори посакуваме и понатаму добра соработка со сите институции во Македонија, со цел целосно да ги ангажираме можностите создадени тука- истакна Ехрет.
На отварањето на новата фабрика на ОДВ Електрик присуствуваше и вицепремиерот за економски прашања Кочо Анѓушев, без никаков срам и покрај тоа што неговата влада им објави војна на странските инвеститори.
Тој со ѓон образ се појави на настанот и инвестиција која во земјава е дојдена уште пред две години и тоа донесена од страна на ВМРО ДПМНЕ, партија која сегашната влада ја посочи и критикуваше како голем поддржувач на странските инвеститори.
Компанијата „ОДВ Електрик“ својата филијала во Охрид ја основаше во јуни 2014 година, а со пробно производство на авто-компоненти во веќе постоечки капацитет во Охрид почна во јануари 2015 година. Градбата на новата сопствена фабрика во ТИР-зоната Охрид/Струга со површина од 10 илјади метри квадратни започна во октомври 2015 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
