Шефот на македонската дипломатија Никола Попоски вчера вечерта во Њујорк разговараше за прашањето за името со генералниот секретар на ОН, Бан Ки-Mун. Денеска министерот Попоски ќе се сретне со посредникот во грчко-македонскиот спор Метју Нимиц.
Попоски по средбата изјави дека во разговорите го подвлекол непринципиелниот услов кој пред 20 години ѝ е поставен на Македонија при приемот во Светската организација поради наметнатиот спор за името со Грција, како и незаинтересираноста на грчката страна за негово надминување.
– Дваесет години како Република Македонија е членка на ОН и 20 години како ни е поставен еден непринципиелен услов од страна на нашиот јужен сосед – наметнатиот спор со името. Она што е значајно е дека го нагласивме фактот дека Република Македонија во овие 20 години целосно ги исполнува своите обврски и сѐ уште сме соочени со ситуација во која првата страна во наметниот спор не покажува, нема никакви знаци за каква било заинтересираност, а воедно ги прекршува своите обврски да не го блокира патот на нашите европски и евроатлански интеграции. Тоа е она што го поделивме со најповиканите, со оние кои го следат овој процес во ОН. Мислам дека е значајно и тоа што најважнта институција од аспект на примена на меѓународното право, Меѓународниот суд на правдата се има изјаснето во корист на Република Македонија, односно проценката дека ова е нелегално блокирање кое ни е наметнато – истакна Попоски.
Министерот за надворешни работи оценува дека се искрени зложбите на генералниот секретар на ОН за надминување на спорот, со оглед на пресудите од судот во Хаг.
– Мислам дека тие заложби се искрени. Навистина мислам дека би сакале да видат овој спор да биде надминат, но немаат инструменти за примена на таа пресуда на Меѓународниот суд на правдата од аспект на односот на Република Грција кон ова прашање. Сметам дека е очигледно дека мотивација во Атина не постои, дека се работи за користење на времето што е можно повеќе да помине за и овој самит да може едноставно да го одбегне ова прашање. Станува сега многу проблематично бидејќи има развиено ескпертиза за наоѓање изговори. Сега и оној изговор кој беше од минатиот период очигледно им е избиен од рака, односно воспоставувањето на Анкетната комисија за Собранието, така што мислам дека сега е навистина очигледно дека не само што воопшто не постои интерес, туку и постои еден смислен пристап во кој не се пристапува кон дијалогот, а од друга страна ни се блокира патот на отпочнување на преговорите кон ЕУ – истакна Попоски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
