Неџат Ибрахимовиќ, гостин на книжевната резиденцијална програма во Скопје

Книжевниот автор и сценарист Неџат Ибрахимовиќ од Босна и Херцеговина присустува на фестивалот „Друга приказна“ кој се одржува во рамки на книжевната резиденцијална програма за автори и преведувачи од Југоисточна Европа „Апсолутно модерен“, во Скопје.

Во рамки на книжевната резиденцијална програма Ибрахимовиќ ќе работи на својот втор роман под наслов „Куќа на островот“. Наративната основа на романот ја сочинува сценарио за игран филм кое десетина години порано било наградено со првата награда од страна на Фондацијата за кинематографија на Босна и Херцеговина.

За време на својот престој во Скопје, тој ќе го претстави и својот роман „Инкапсулирани тела“ пред македонската читателска публика, кој беше објавен на македонски јазик во 2016 година, во издание на Готен.

Ибрахимовиќ е роден 1958 година во Тузла. Тој е книжевен и филмски критичар, сценарист и автор на документарни филмови. Завршил Педагошки факутет во Осиек и постдипломски студии во областа на книжевноста на Филозофскиот факултет во Загреб. Докторирал на Филозофскиот факултет во Тузла во областа на книжевноста на Босна и Херцеговина. Завршил и телевизиски студии на Медија-академијата во Холандија. Објавувал книжевни студии и интерпретации, театарска и филсмка критика во различни списанија и снимал документарни филмови за холандски телевизиски куќи. На универзитетот во Вашингтон предавал јужнословенски филм и јужнословенска книжевност во егзил и како гостин предавал на Факултетот за уметност во Подгорица. Вработен е на Универзитетот во Тузла како редовен професор по книжевност и историја на филм и е претседател на ПЕН центарот во Босна и Херцеговина.

Има освоено повеќе награди, меѓу кои специјална награда на жирито за документарниот филм „Полн месец над Босна“ на Фестивалот за видео-остварувања „De Gouden Vlam“ во Амстердам 1997 година, награда од Фондацијата за кинематографија на Босна и Херцеговина за сценарио за игран филм под насловот „Куќа на островот“ и награда доделена од Фондацијата за издаваштво на Босна и Херцеговина за книгата песни со наслов „Мала историја на смртта и пишувањето“.

Програмата на книжевната резиденцијална за автори и преведувачи од Југоисточна Европа „Апсолутно модерен“ е во организација на издавачката куќа Готен, а се реализира под покровителство на Европската мрежа за превод и книги Традуки

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.