Груевски: Со волкав буџет и скромни средства, сериозен успех е да се реализира толку многу во Гази Баба

Денеска претседателот на ВМРО-ДПМНЕ Никола Груевски, продолжи со теренските активности и средби со граѓаните низ населените места во Република Македонија, а беше да ги слушне проблемите и потребите на граѓаните во Општина Гази Баба.

На новинарско прашање како е задоволен од работата и проектите во оваа општина, Груевски кажа дека таа е многу сложена и тешка за водење, затоа што во голем дел е рурална, со големи и реални потреби на граѓаните кои што треба да се завршат, а со прилично низок буџет во однос на потребите.

– Во едни такви услови направено е максимум од страна на општината, со поддршка и на градот Скопје, со поддршка и на Владата. Од она што може да се види јавно во отчетот што градоначалникот го подели, изградени се околу 85 улици со вкупна должина од околу 100 километри, изградени се вкупно канализациони мрежи и водоводи околу 40 километри, изјави Груевски.

Лидерот на ВМРО-ДПМНЕ напомена дека изградено е едно училиште во Железара, а уште едно се гради во Хиподром. Покрај училиштата во Гази Баба е изградена и една детска градинка и во тек на реализација се многу други проекти, кои не се така крупни како другите како што кажа Груевски, меѓутоа општината работи на нив.

– Во едни такви сложени околности можам да кажам дека работите се одвиваат добро и дека имаме успех. Во четири години да се направат толку работи, со толку мал буџет и со толку скромни средства е сериозен успех, изјави Груевски.

Тој потенцираше дека општината има уште многу потреби, но кажа дека тие и понатаму ќе останат посветени на оваа општина и доследни на она што го ветуваат пред граѓаните.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.