Мекгрегор и Мејведер влегуваат во ринг – провокации и закани уште на мерењето

Конор Мекгрегор и Флојд Мејведер во Лас Вегас ќе ги одмерат силите во големиот боксерски меч. Големиот спектакл подготвуван и најавуван со месеци ќе се одржи вечерва во Лас Вегас, а почетокот на мечот е утре наутро во 5 часот по средноевропско време.

„Борбата на векот“ како што многумина го нарекуваат овој дуел меѓу боксерската ѕвеѕда Флојде Мевједер и ММА ѕвездата Конор Мекгрегор, на двајцата ќе им донесе по стотина милиони долари заработувачка. Дуелот ќе се пренесува низ целиот свет и се очекува да урне бројни рекорди по гледаност.

Пензионираниот Флојд Мејведер поради оваа борба реши повторно да се врати во рингот и да остане непоразен и во јубилејниот 50.меч колку и да е тој егзибициски. На спротивната страна ќе биде УФЦ шампионот во две категории, Конор Мекгрегор. Ирецот е во животна форма и решен е да докаже дека тој е главната ѕвезда во овој спектакл.

Мејведер и Мекгрегор често беа во судир и на промотивните настапи пред мечот, а тоа не изостана ни на официјалното мерење пред вечерашниот дуел.

Мечот е договорен на 12 рунди на тежина од 69.5 килограми, Мекгрегор на вагата имаше 69,4, а Мејведер 68 килограми. Ирецот по мерењето му се внесе во лице на својот противник и се обиде да предизвика реакција кај него, но Американецот само ладно го гледаше и не му возврати со ниеден збор.

„Ќе прелетам низ него. Јас сум професионалец. Подготвен сум, во вистинска тежина сум. Ќе бидам многу поголем од него. Гледам човек што се плаши, и вие ќе го видите тоа утре“ – порача Мекгрегор.

И покрај „чаламот“ на Мекгрегор, на обложувалниците Мејведер важи за голем фаворит во овој боксерски спектакл. Но, има и голем број фанови и стручњаци кои веруваат дека Мекгрегор во својот прв професионален боксерски меч може да го порази непоразениот шампион.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.