На „Македокс“ промовирана книгата „Социјалниот архетип во документарниот филм“ од Маријана Котевска-Георгиева

Во Куршумли Ан, во рамките на осмото издание на Фестивалот на креативен документарен филм „МакеДокс“ се одржа промоцијата на книгата „Социјалниот архетип во документарниот филм“ од Маријана Котевска-Георгиева, а во издание на „Арс Ламина публикации“.

Во книгата „Социјалниот архетип во документарниот филм“ се обработени девет документарни филмови, при што се согледани сферите во кои се поврзуваат социјалниот синдром како рефлексија на средината од една страна (што е присутен во речиси секој документарен наратив) и креативниот импулс кај документаристите како автори, од друга. Преку јазикот на книжевната теорија и филозофијата, интердисциплинарно се опфатени различните релации меѓу филмот и книжевноста – како креативни естетики, сместени во рамките на теоријата и филозофијата – како научни естетики.

Фокусот во книгата е ставен на неколку истражувачки полиња: улогата на социјалната средина и нејзиниот силен импулс што ги стимулира документаристите на запис; битноста на реалната информација или фактот пренесени преку документарниот филмски јазик; начинот на перципирање и реакција од страна на публиката; и улогата и креативниот јазик на авторот.

Маријана Котевска-Георгиева

Заедно со авторката Маријана Котевска-Георгиева, на промоцијата за книгата зборуваа Илинденка Петрушева, филмски критичар и есеист, проф. д-р Владимир Блажевски, режисер и редовен професор на ФДУ Скопје и ФДУ Белград, д-р Кристина Николовска, историчар, истражувач на хуманистички науки, и Атанас Георгиев, монтажер и документарист (чиј филм „Со Љубов“ го отвори „МакеДокс“).

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.