Абади ја најави офанзивата за ослободување на градот Тал Афар од ИД

Ирачкиот премиер Хајдер ал-Абади го означи почетокот на битката за освојување на градот Тал Афар, последниот бастион на групата Исламска држава во северната ирачка провинција Ниневија, пренесоа светските агенции.

Облечен во воена униформа, Абади синоќа преку телевизиско обраќање го најави почетокот на операцијата за ослободување на Тал Афар.

-На луѓето од ДАЕШ (арапски акроним за ИД) им кажувам дека немаат друг избор освен да се предадат или да бидат убиени, дополни тој, застанат пред картата на Ирак и ирачкото знаме.

Тал Афар се наоѓа на 70 километри западно од градот Мосул, вториот по големина град во Ирак, од кој ирачките сили, поддржани од САД, на почетокот на јули ги протераа џихадистите по офанзивата што траеше неколку месеци.

Абади прецизира дека освен различните единици на ирачката армија, полицијата – федерална и локална, и единиците за борба со тероризмот, во офанзивата за ослободување на Тал Афар учествуваат и Силите за народна мобилизација – паравоена организација, во која доминираат шиитски милиции, а се поддржани од Иран. Тие веќе учествуваа во други битки за враќање на контролата врз ирачките градови.

Освен Тал Афар, ИД се уште го контролира и градот Хавиџа, во провинцијата Киркук, на 300 километри северно од Багдад. ИД е присутна и во западната провинција Ал Анбар, посебно во реонот на Ал Каим, што граничи со Сирија.

Ирачките сили минатиот вторник почнаа воздушна офанзива врз Тал Афар, како подготовка за копнената офанзива, чиј почеток беше прогласен изминатата ноќ од премиерот Абади, потсетува ДПА.

Тал Афар е во рацете на ИД од средината на 2014 година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.