Изворите во кочанското село Рајчани целосно пресушија поради високите температури и долготрајната суша. Состојбата со немањето вода за домаќинствата и за напојување на добитокот е алармантна, велат жителите.
– Ситуацијата ја спасува Противпожарната единица од Кочани која со цистерни ги снабдува населението и добитокот, но и тоа се ограничени количини. На над 300 грла крупен и ситен добиток им е потребна вода за опстанок- изјави претстедателот на Месната заедница Љубен Тасев,.
Според него, со години наназад на жителите од ова планинско село во Осоговијата кои се главно сточари, им се ветува дека ќе добијат вода од нов водовод, но досега ништо конкретно не е направено.
– Доколку се реши проблемот со водоснабдувањето и се зафатат неколкуте извори околу селото во резервоар, но и да се асфалтира патот од село Пантелеј со село Рајчани во должина од четири километри, може да се очекува дека голем број иселени жители кои го напуштиле селото, повторно ќе се вратат и ќе ги заживеат родните ниви и огништа, истакна Тасев, додавајќи дека во Рајчани има одлични услови за сточарство, овоштарство, пчеларство и други селско – стопански гранки.
Рајчани се наоѓа на границата меѓу општините Кочани и Пробиштип и до него е асфалтирана делница која го поврзува со селото Турско рудари во општина Пробиштип.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
